為避孕丸平反

啦啦：

好了~~趁著兔年將盡，等我破去年的紀錄，極速給你一篇回應吧！

你講起情人節濕皮文，我就諗起陳年那個「十萬火急」企劃，該是為聖誕新年而做的，因為那是一本有12個月的月曆日記本子，12個月賣俾12個客，由開始賣到實際out稿的時間，該不到三天。那瘋狂的全天候即入即砌即confirm日子，sales隨時打熱線電話入job，本座隨時開咪報告善長數字，邊個writer俾我見到有手空出來就邊個接稿，再跑入影樓立即影相立即入art，衝鋒陷鎮得令人不敢忘記。

以上種種都難不到我們的隊員，最教人頭大的，是那附在每個月曆上，與該月所賣產品有關的送禮貼士，幸好該12個客的產品總算大路，我們愁的是用甚麼方法寫會合理得來又不行貨，有誠意得來又不會跟其他隊員寫的內容撞字，最後出現了我們為每個節日濕皮文所設定的送禮口訣：

「女朋友送俾男朋友；男朋友送俾女朋友；女朋友想男朋友送俾自己！」

這個三分法總算解決了當日的燃眉之急，至於你那「避孕丸」該歸入哪類呢？我覺得三類都可以喎！

．如果係歸類為「女朋友送俾男朋友」，可能就係女朋友想給男朋友一個溫馨提示：「去滾都別搞大人家個肚！」

．如果係「男朋友送俾女朋友」的話，應該係男友要話俾女朋友知：「我要乸唔要仔，真係好愛你！」

．如果係「女朋友想男朋友送俾自己」的話……潛台詞你諗埋佢啦！

所以呢，你話「避孕丸」不該作為情人節禮物，我倒想說，其實這是否只是我們太迂腐保守？你都知現在乜人都有，可能真係有人送得出，而又有人真的收得開心喎！不過我也得承認，「避孕丸」的確比我曾為情人節濕皮文寫的「嫩紅素」與「潤滑劑」難以下筆和成理的。

無論如何，我是支持你的，避孕丸不應作為情人節禮物，所以請容許我獻計一次：

「不如你將這個PR放在不久將來的結婚濕皮文啦！」（請用你的衰聲向有關人士反sell）

試想這個放在結婚主題可以多麼順理成章？簡單的可以是因為「要享受二人世界就要食避孕丸喇！」，警世一點的又可以是「沒有水準的夫妻就不要生小朋友為害生靈，記得記得記得要食避孕丸喇！」

祝你成功~~

P.S既然已經破了2011年的紀錄，咁我收爐喇~~龍年再破！

淙

執野走

啦啦：

話咁快三月已過了一半，又個多月沒了稿影……可想而知我們有多忙，不過又不太清楚忙了甚麼，最清晰的倒是工作以外的話題。

近一個月，友儕間的話題總不缺《黑天鵝》，由戲中的dark與瘋，講到網上流傳的making of，大家都同意這是裡裡外外都很犀利的一齣好戲。某次說起戲中排舞室的情節，連鏡中倒映了拍攝中的攝影師也執走了，真的很認真很勁，我就以為，執走攝影師應該是這片眾多特技中，最簡單最基本的一環。

然後，又聯想到，我們工作上許多環節都是以「執野走」為最簡單最基本的，好似photog要執走model的墨屎、眼紋、黑眼圈，designer要執走layout上多餘的「擺設」，這些都比「加野」更基本，總之就是出版世界電腦化後，「執走」基本上是以上兩職的入門必備，無得話唔識。其實早於出版電腦化的年代，「執野走」在我們撰稿界早已流行，是基本也最簡單，可惜我們常常忘了這金科玉律。

以前讀廣告班，老師曾說地鐵站內扶手電梯旁的廣告，任你企定注目，由視線接觸到廣告到回頭望到視線離開，只是短短四秒，要人家在短時間內吸收廣告所發放的資訊同有印象，除了畫面重要外，用字精煉到肉當然也是必須，但這放諸雜誌廣告專輯又不同講法了。

一來，讀者睇雜誌唔會只睇四秒，就算現在唔睇都可以等陣再睇；二來，廣告專輯始終都係模仿編輯稿，太短太精煉又不是那回事。所以寫起稿來要拿捏長得來唔累贅，短得來有point都有難度，而我的入門就係「執野走」。

初出道俾阿頭篤住話的，就係「多廢話」，有拋書包之嫌，實情我真心唔係要拋書包，但諗返轉頭，那應該是當年表達的壞習慣，經常覺得簡單一句人家可能唔明自己講乜，所以習慣加多幾句「講清楚D」！現在當然知道唔清楚的話點講都係唔清楚的事實，當年就係真的不知不覺；而阿頭教落的檢查法係，寫完份稿，試下逐句睇，揞住一兩句，睇下刪去果兩句會唔會接唔到，如果刪走了都一樣，即係可以乾脆delete，即使你覺得果句寫得幾咁好，幾咁可以傳達你的心聲，都係多餘。

多年之後，到我要人刪去多餘廢話，有人答我：「可唔可以唔cut？那是我的風格。」俾我揀，我會揀「短小精煉」做個人風格，都唔會揀「冗長多餘」。因為當讀者只係識你係老鼠的時候，係唔會知道你有咩風格的，佢只會睇到一堆講來講去三幅被的文字，然後睇到一半揭去下一頁，然後發現版版如是，索性唔睇。

所以幾咁唔捨得都好，學下執野走，執走多餘無謂用字，盡量做到一句都不能少，反而仲顯功架，仲有型。不過我都仲學緊~~

淙